नवी दिल्ली : होंडा मोटरसायकल अँड स्कूटर इंडिया प्रा. लि.ने वायू उत्सर्जनाबाबतच्या भारत-सहा (बीएस-सिक्स)निकषांची पूर्तता करणारी अत्याधुनिक १२५ सीसी क्षमतेची मोटरसायकल ‘एसपी१२५ बीएस-सिक्स’ दाखल केली आहे.
याबाबत बोलताना होंडा मोटरसायकल अँड स्कूटर इंडियाचे अध्यक्ष मिनोरु कातो म्हणाले, ‘अॅक्टीव्हा १२५ या देशातील पहिल्या बीएस-सिक्स दुचाकीला ग्राहकांचा उदंड प्रतिसाद मिळाला. आता आम्ही ‘एसपी १२५’ ही बीएस-सिक्स’ची पूर्तता करणारी मोटरसायकल दाखल करत आहोत. त्यामुळे या श्रेणीतील तंत्रज्ञान, स्टाइल व कामगिरी यांचा दर्जा उंचावला जाणार आहे.’
होंडा मोटरसायकल अँड स्कूटर इंडियाचे सेल्स व मार्केटिंगचे वरिष्ठ उपाध्यक्ष यदविंदर सिंग गुलेरिया म्हणाले, ‘होंडाचे दर्जेदार तंत्रज्ञान आणि या श्रेणीतील अनेक पहिलीवहिली वैशिष्ट्ये यामुळे ही नवी मोटारसायकल उत्तम कामगिरी करणार असून, ती १६ टक्के अधिक इंधन कार्यक्षम आहे. या मोटारसायकलसाठी सहा वर्षांची विशेष वॉरंटी देण्यात येत आहे.’
‘एसपी १२५-बीएस-सिक्स’ दोन प्रकारांमध्ये (ड्रम व डिस्क) आणि चार रंगांमध्ये (स्ट्रायकिंग ग्रीन, मॅट अॅक्सिस ग्रे मेटॅलिक, इम्परिअल रेड मेटॅलिक, सेरेन ब्लू) उपलब्ध असून, तिची किंमत ७२ हजार ९०० रुपयांपासून (एक्स-शोरूम, दिल्ली) पुढे आहे.